VIENTO D’AUTUNNO
GIUSEPPE PELLINO
Autunno! Quanta fronne so’ cadute,
comm’’e speranze meje, pe ‘n miez’’a via,
senza cchiù pace, povere, perdute,
cchiù amara e triste d’’a malincunia.
‘O viento ca luntano l’ha sbattute
E ‘ntòsseca stu core ‘e nustalgia,
‘o viento nun ‘o dice addò so’ ghiute
Fronne e speranza ‘e tutt’’a vita mia.
Ma io ca pe na strada scura scura
Tengo na fronna ca me sfuje p’’e mmane
E ‘o penziero c’’a perdo m’appaura,
io guardo ll’ate fronne già luntane,
e chiagno, comme fa na criatura
ca è senza mamma e pate, e cerca ‘o ppane!...
Da ACENE D’ORO
La Floridiana- Napoli 1956